فورۋمدى اشقان گۇلشارا ابدىقالىقوۆا كورنەكتى نەيروحيرۋرگ, رەسەي عىلىم اكادەمياسىنىڭ اكادەميگى ا.پوتاپوۆتىڭ 70 جاسقا تولۋىنا وراي جولداعان قازاقستان پرەزيدەنتىنىڭ قۇتتىقتاۋ حاتىن وقىپ بەردى.
مەملەكەتتىك حاتشى گۇلشارا ابدىقالىقوۆا نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىنا سايكەس, قازاقستاننىڭ يندۋستريا 4.0, ونىڭ ىشىندە مەديتسينا سالاسى ەلەمەنتتەرىن ەنگىزۋگە كىرىسكەنىن ايتتى.
– پرەزيدەنتتىڭ باستاماسىمەن 2008 جىلى نەگىزى قالانعان ۇلتتىق نەيروحيرۋرگيا ورتالىعى دەنساۋلىق ساقتاۋ سالاسىنداعى يننوۆاتسيالىق جەتەكشى مەكەمەلەردىڭ ءبىرى بولىپ سانالادى. بۇگىندە ول ورتالىق ازياداعى كوش باستاۋشى كلينيكانىڭ بىرىنە اينالدى, – دەدى گ.ابدىقالىقوۆا.
ۇلتتىق نەيروحيرۋرگيا ورتالىعىندا 10 جىلدىڭ ىشىندە 37 مىڭنان استام ادام ەم قابىلدادى, 25 مىڭنان اسا وتا جاسالدى, 66 نەيروحيرۋرگيالىق جاڭا تەحنولوگيا ەنگىزىلدى. ونىڭ بازاسىندا قازاقستاندا العاش رەت نەيروحيرۋرگيانىڭ جاڭا سالالارى – ميكرونەيروحيرۋرگيا, ەندوۆاسكۋليارلىق, ەندوسكوپيالىق جانە فۋنكتسيونالدىق نەيروحيرۋرگيا ەنگىزىلدى.
سوڭىندا مەملەكەتتىك حاتشى فورۋمعا قاتىسۋشىلارعا شىعارماشىلىق تابىس تىلەپ, استانانىڭ 20 جىلدىق مەرەيتويىنا ارنالعان مەرەكەلىك سالتاناتتى ءىس-شارالارعا قاتىسۋعا شاقىردى.
فورۋمعا دەنساۋلىق ساقتاۋ ءمينيسترى ە.ءبىرتانوۆ, استانا قالاسىنىڭ اكىمى ءا.يسەكەشەۆ, پارلامەنت دەپۋتاتتارى, الەمنىڭ 20-دان استام ەلىنەن كەلگەن نەيروحيرۋرگيا سالاسىنىڭ جەتەكشى ماماندارى قاتىستى.
ءىس-شارا استانانىڭ 20 جىلدىعى قارساڭىندا ۇلتتىق نەيروحيرۋرگيا ورتالىعىنىڭ 10 جىلدىعىنا وراي ۇيىمداستىرىلدى.